「食個麵為見你一面？」你估拍廣告咩！蘭州拉麵皇老闆盧偉良話：「以前我老婆係呢度常客；每日嚟傾吓食吓，有時借啲意同佢講拉麵……」之後傾傾吓就「𠝹」咗個老婆番嚟！
手拉麵一向覺得係大酒樓嘅「高價表演」，好難想像呢度$29有碗手拉麵加熱飲，「我哋10年老字號，所有麵都係即叫即拉！」老婆兼Fans即刻插嘴：「我覺得佢整嘅手拉麵最好食，可能人夠大隻手夠力，拉出嚟嘅麵特別彈牙好味！」「喺午飯、晚飯時間，我見過佢1分鐘可以拉3個麵，絕對唔可以叫客人等嘛！」
𠵱家結咗婚反而難見面：「老婆返6點，我就下晝3點接更，基本上只係交接嗰個鐘先會同時喺舖！」老婆話最開心就係凌晨2點，返到屋企大家一齊食消夜：「我會煮佢最鍾意嘅家鄉年糕，以前佢成日煮畀我食，𠵱家要掉番轉頭呢！」
記者：朱崇德
攝影：伍慶泉
招牌五香牛肉拉麵$29
最熱賣，五香金錢𦟌完全自家製，勁有咬口夠入味；拉麵是由蘭州老師傅做，即叫即做有水準。
上海小籠包$25/10隻
係筆者食過最好的小籠包，新鮮豬肉、又係即叫即做；可能做開拉麵，整包反而特別有一手，薄到透明又點夾都唔穿，高招！
咖喱蝦球飯$35
不計成本之作！請廚師專做咖喱廿幾年，以全鮮蝦做，椰汁香混和咖喱香，撈飯最正。
蘭州拉麵皇（26121528）
地址：荃灣兆和街34號地下
