前鴻運地產老闆田國強同佢老婆沈國芳，畀地監局傳召，話佢哋違反代理操守守則，同埋田國強嘅破產令事宜接受研訊，由原定7月押後至9月份進行，噚日地監局將田國強嘅紀律制裁刊登憲報，根據字面意思，08年10月31日之前，又或者佢個破產令解除之前，佢每半年就要申請一次代理牌照續期，即係唔使吊銷牌照，而之前因為佢申請咗破產令，而附加喺佢個牌照上嘅限制，例如唔可以做本地代理行嘅經理、董事同合夥人等，仍然有效。
田氏夫婦所違反嘅代理操守，包括佢哋做出咗可能令業界信譽受損嘅行為，同埋從事咗可能觸犯法律嘅活動，講緊嘅係當年鴻運地產曾經試過無牌經營一段時間。
其實，自從田國強決定喺03年2月突然將公司結束，佢就一直官司纏身，最大鑊當然係牽涉入屯門茵翠豪庭嘅偽造交易呃銀行貸款案，最後被判無罪。好多人都會諗，田國強同鴻運地產，見證咗香港樓市盛極而衰嘅業界慘況。
電郵地址：[email protected]