霍英東逝世，治喪委員會有七十四人，可謂猛人如雲。左丁山睇完張名單，有八位人士嘅名字唔熟，不知何許人也，可能係京官啦，不過能夠列入呢七十四位之內嘅，一定唔係泛泛之輩，因為張名單要由霍家與中央決定嘅，冇番咁上下，邊會有人睇得起。
點解治喪委員會有七十四人，唔係七十三人或八十三人，甚至一百人呢？其實五十人都得㗎。食飯時候，餐廳內啱啱有一位相識在座，名列治喪委員會之內，於是走埋去問吓呢位治喪委員：「請問點解係七十四人？有冇含義？」委員擰頭：「唔知。」再問：「點樣選七十四人呀？」委員答：「唔知，事先冇人問過我。你知啦，凡有老友過身，家族或團體為佢辦喪事，成立治喪委員會，係增加聲勢嘅啫，實際事情嘅安排會由家族或團體搞掂晒，但宣布委員名單之前，家人一定會問過我肯唔肯加入，人哋問到，我梗話得嘅。呢次霍老嘅治喪委員會之七十四人名單，我喺十一月二號睇報紙先知道我榜上有名，事前冇人問過我，可能佢哋太忙，又知道我一定冇計較，一定願意做啦。」
哦，咁又易辦事喎，如果事先通知，打七十四個電話都幾煩㗎，左丁山做過兩次治喪委員咁多，雖然冇實際工作做，但出殯前收到與打出嘅電話多到不得了，好花時間。關於霍英東嘅古仔，呢排多到聽唔晒。睇報紙啲年輕記者編輯寫，十分表面。最好聽嘅故事來自一啲八十歲以上嘅前輩，佢哋與霍先生同輩（霍生八十三歲），年齡差不多，知道好多嘢。一位八十二歲前輩對左丁山講：「講今日昨日之事，我唔多識，前晚我喺邊度食晚飯，我都要諗一輪。但五十幾年前之事，邊個靠乜嘢發達，點樣搵第一桶金，我記得一清二楚。利家、李家、許家、簡家、馮家等等事業，我比較瞭解。五十幾年前，未輪到霍英東，佢……」講到呢度，有人稱讚霍先生愛國，係中國共產黨親密朋友，前輩即刻話：「我有啲攰，唔好再講咯，大家飲茶！」