周六進行兩場意甲聯賽，戲碼較弱兼且衰到冇直播，但冇得睇不一定賭唔過，以「尾場」里賈納迎戰卡坦尼亞的南部打吡為例，客軍陣殘值捧主隊W。
都係一句，如非里賈納季前被扣15分，現在應處於聯賽榜中上游位置，切忌被其排名所惑。這支南部兵團本季的最大驚喜，莫過於前祖雲達斯鋒將尼高拉阿武羅素，以及意大利「小國腳」路蘭度比安基合作如魚得水。一老一少，一個老波骨夠蠱惑，另一個為博上位鬥志十足，難怪開季至今已合計攻入8球，攻擊力非常銳利。
撇開此點，里賈納今季的主場水準甚穩，3勝1和，強如羅馬來訪也得俯首稱臣。份屬南部打吡，卡坦尼亞此戰必不乏戰意，問題在於今仗既有佐治奧哥朗拿養傷，而經常作出不必要犯規的「茅王前鋒」馬斯卡拉亦停賽，前線只餘史比尼斯獨力支撐，不利搶分。
頭場吼帕爾馬「客勝」
一如其他南部打吡戰，相信今次兩支級數相若的球隊對賽會鬥得激烈，里賈納將贏在氣勢及人腳較完整，單吼1.8倍主W已不錯；若攻讓球主客和值得試3.1倍「和」。個人波膽心水為主隊小勝2:1（8倍）。
同日「頭場」由錫耶納主場對帕爾馬，論季初氣勢當然以主隊稍為秤高，不過錫耶納的攻擊力及強攻爭勝的能力一般，而且近期的主勝率不高。反觀帕爾馬一班「生牯仔」愈戰愈勇，近4場比賽贏3場，絕不好惹。值得冷吼帕爾馬不敗，取1.85倍「客勝」或直接攻3.2倍和波。
藍鑽石