中移動（941）再升0.60元，帶動恒指又創新高，升34點，呢隻中移動，唔經唔覺市值已增至13500幾億，如果真係上番80元歷史高位，甚至破埋呢個高位，市值隨時追得到巨無霸滙控（005）的17200幾億。2000年科網股熱時，中移動市值曾高過滙控，6年後估唔到中移動又有力追番上嚟。
由新地（016）負責發展，前身係九巴車廠嘅豪宅新盤曼克頓山，有報道話有個獨立屋單位以1.5萬元呎價售出，同都係新地嘅凱旋門一樣造出天價交易。受到消息刺激，載通（062）連升兩日，噚日再升6.9%，最高45元。
呢架九巴快車，趙飛雲開市無耐就追，追到氣咳先買到6000股，估唔到巴士股開車都可以開得咁快。前日搭完地鐵（066），噚日要追巴士，加埋之前坐兩轉順風機買完國泰（293）買國航（753），成手都係運輸股，個倉變咗運輸股基金。
工行起動伺機買
運輸股受惠油價下跌，但太過集中，令風險過大，因此下星期會睇位沽出其中一隻航空股，至於地鐵同載通會受惠地產市道，噚日地產股抬頭，暫時都唔使怕，如果沽咗貨，會諗吓剛起動嘅工行（1398）。
趙飛雲