太平洋航運（2343）本周四出咗份通告，內容係講最新交易活動情況，包括講今年以來嘅亁貨行業情況，運費持續上升，新船估值提高，更詳細列明目前接單情況、貨船租金變動、收租日數，以及船隊最新運作情況等，與其話係通告，不如講係寫俾證券分析員睇嘅營運數據。
呢間公司，一向都透明度好高，不過呢間由外國人BUTTERYChristopherR做主席嘅公司，大股東並唔係佢，早兩個月仲係摩根大通，持有7.96%，最新大股東，係上月17至20日連續4日大手增持股權嘅非執董李國賢，佢喺4.81元至5.09元共掃入2266萬股，持股增至10%。
呢位李先生原來係航運界老行尊，係一間1954年成立，從事海運、保險、貨倉、運輸等嘅非上市公司新興集團主席，也是永亨銀行（302）董事。姑勿論李先生大手增持嘅理由係乜，單計呢位老行尊見慣呢行起起跌跌咁多年，已經值得相信佢嘅眼光。
太航今年都有好多大動作，除於今年訂了12艘散貨輪，亦於6月時由丹麥船公司Torm挖角，聘請丹麥人Nyborg出任太航副行政總裁兼執行董事，近日有市場消息話，有個中資航運公司高層會過檔，挖角行動陸續有來咁話。
近日都有唔少大行同太航出報告，高盛同美林都對太航營運數據十分滿意，目標價分別調升至6元及6.40元，雷曼兄弟睇得最好，給予太航增持評級，目標價為7.50元。
歐陽風