歐洲已經轉了冬令時間，這周中的歐冠盃賽事開始，球迷要捱夜睇波；但對於我這種寫馬經的人，借用補習天王的宣傳口號:「早起冇難度」也！我雖然不是天天去睇晨操，但要我提早1小時在3點幾起床，實在veryeasy，反而要為如何分配時間發愁。
以前是免費電視頻道播歐冠盃，睇到完半場前5分鐘就熄機，飛車出馬場，去到即開電視，應該剛好是下半場開波。上半場最後5分鐘通常冇嘢睇，入了更衣室檢討戰略，下半場初段往往就是關鍵時刻。當時鐘踏正5點，晨操開始，就要一心二用，波馬兼睇。
睇完波睇晨操
家陣由收費電視播歐冠盃，在馬場冇得睇了，好彩巴塞對車路士那場是星期三清晨進行，通常這是我的偷懶日，所以可留在屋企安心睇波。不過，晨操時間是由5點至8點半，睇完波才去馬場，其實還有許多馬匹出試，只是找多個懶惰藉口而已。球迷們假如睇完球賽，精神亢奮瞓唔番的話，不妨跑去沙田睇吓晨操呢！
張美德
記者出身的著名馬評人，現職馬會節目主持人。