經過周中嘅歐冠盃之後，又返到嚟常規聯賽。喺英超方面，有一場小型嘅榜首戰，由曼聯主場對樸茨茅夫。講真嗰句，大家唔算屬於同一級數，但礙於聯賽上嘅排名，有少少「大戰」嘅感覺。先講往績，數番上次曼聯輸畀樸茅係兩年前嘅事，之後對碰曼聯都係清風送爽咁贏波。
曼聯早幾日大意地輸畀哥本哈根，球迷們唔需要咁驚，曼聯能夠成為強隊係因為班波鬥心夠強，唔會話輸場波就散晒；反而更會化悲憤為力量，加上難得領先住車仔嚟踢，冇理由唔全力搏殺，所以話樸茅今個禮拜唔好彩喇。賠率方面，主勝只有1.38左右，而外圍一開就讓球半，相信主客和主勝會一路被壓低。
保頓要踢爭氣波
另外一場值得玩嘅係保頓對韋根；上一輪，保頓主場畀曼聯數4粒兼破主場不敗之身，韋根就作客贏富咸。今個禮拜保頓再次喺主場作戰，點都會踢番場爭氣波。
韋根亦唔再係舊年支神奇球隊，上場贏嘅只係富咸，今次保頓中後場硬淨好多，應該唔會再好似上個星期咁多入球機會。保頓只要生生性性，黑雙煞廸奧夫同安歷卡絕對有入波機會。
謝利
立博亞洲區首席博彩顧問
電郵：[email protected]