左邊有「細哨」突破，右面有美斯闖關，中間有廸高、沙維後上，你話拉科班球員知唔知道巴塞呢個進攻方程式呢？
好似施丹年代嘅皇馬，粒粒皆星，個個球技出眾，一㩒掣，5分鐘之內一定入波，對手根本無能力頑抗！
不過，我相信呢個世界係陰陽五行相生相剋的，俗語係「格食格」。巴塞本來好勁，不過冇咗伊度奧之後，隊波冇晒火，輸畀皇馬，和埋車仔！已俾人哋捉到巴塞嘅路。
今晚拉科主場鬥巴塞，前者青春班，重球員培訓，不信名牌，打整體，有鬥心，見到班後生仔咁努力，連老鬼都搞到有火！反觀巴塞，左右兩邊嘅「細哨」同美斯，對方教練已經識得搵人招呼佢地，加上拉科教頭卡柏路斯係有料之人，我對拉科有信心！
捧兵工廠車仔齊win
如果大家唔敢博拉科，阿仙奴串車仔，齊齊客勝過關，都係一個唔錯嘅選擇，儘管韋斯咸上場贏波，始終都係垂死掙扎！而意甲方面，大家真係要多留意費倫天拿，上仗輸畀巴勒莫，其實係五五波，明晚對羅馬，有機會和波！
周鵬
商業1台《球迷集中贏》主持
電郵：[email protected]