東風日產不斷在賽事中贏取錦標，比日本廠隊更出色，最近東風又喺2006年全國汽車場地錦標賽（CCC）最後一站比賽中勝出，所以話呢，祖國賽車同改車技術都進步緊，分分鐘「超日本、趕德國」，呢勻真係雙喜臨門喎！
記者：鄭達基
最後一站 全力作賽
喺10月29日舉行嘅2006全國汽車場地錦標賽，原來係今屆最後一站賽事；喺當日嘅比賽中，競爭最激烈嘅會係1,600c.c.組別總決賽，因為佢係2006年CCC嘅最後一場總決賽，所以全部車手都出盡力作賽。經過33個圈嘅激戰之後，最後由東風日產基亞車隊嘅19號車手郭海生，以佢嘅出色戰術奪得呢個組別最後一站賽事嘅冠軍。
咁仲唔止呀，原來郭海生仲成為全國汽車場地錦標賽全年車手總冠軍，而且仲幫東風日產基亞車隊奪取咗全年車隊總冠軍㖭！
贏盡全場 戰績輝煌
東風日產全資擁有嘅東風日產基亞車隊同埋778車隊，參加咗今年1,600c.c.同2,000c.c.組別嘅全年6場比賽；而喺呢2組比賽中，兩隊車隊分別以66分同65分嘅總成積，而奪得兩個組別嘅車隊年度總冠軍。至於東風日產車隊嘅郭海生（19號車）、何曉華（20號車），亦分別以40分同28分嘅總積分，而取得1,600c.c.組別嘅車手總冠軍同總季軍。至於778車隊兩部日產Sunny賽車，亦取得2,000c.c.組別嘅年度車手總冠軍同總季軍，認真巴閉。
