師傅仔為咗要我哋見識吓，一收舖車咗我同門神蕭國基去深水埗，話係特別行動！
停好車之後，佢快過飛虎隊，幾個箭步，標咗埋去海鮮缸嗰度伸長條頸，眉飛色舞咁話：「民以食為天！嗱！魚、蝦、蟹、魷魚、帶子、花螺，樣樣都要試!」嘩！呢餐濕滯囉！至怕同人迫，秋高氣爽，3個人開張枱仔喺門口，快！
閒話家常論盡球圈
估唔到深水埗區別有洞天，入夜後更覺寧靜，我哋一路擦，一路閒話家常，學習師傅仔嘅處世之道。
咦！黑衣判官？仲有喺榜首大戰執法嘅日本球證？哦？原來佢哋谷完體能，過嚟醫肚！好彩我平時喺球場唔搞事，唔係實有排「哦」呀！方sir、馮sir同師傅仔論盡球圈，經驗之談令晚輩獲益良多，更有體察民間疾苦之感。
翌日沙田運動場，為體藝中學致辭，喜見師弟妹都精乖活潑，衷心寄望好好珍惜快樂而短促的中學時代，培養出優良品德及分析能力，為香港未來作出貢獻！
馮嘉奇
碩士球員讀萬卷書，親身歷盡各國足球風情。