無綫嘅《翡翠歌星賀台慶》今晚舉行，一眾歌手連日來忙於綵排，馮仁昭收到風，話無綫要執正紀律，嚴懲遲到同缺席嘅藝人，結果吳日言（阿Yan）就咁犧牲咗。
阿Yan呢排忙緊拍無綫新劇《學警出更》，同時又要抽時間綵排台慶演出，兩頭騰都好吃力。本來佢除咗演出台慶夜嘅opening同closing，另外仲演出一part社交舞，由陳小春、陳慧琳帶頭，但馮仁昭發現噚日個節目流程已經冇咗阿Yan個名。
其實阿Yan之前已經排咗兩日舞，每日排十幾個鐘，前日係第三次綵排。通告寫明三點，阿Yan事前已通知台慶嗰邊話一拍完《學警》即刻趕過去，點知對方話三點三前唔到就唔使跳，阿Yan啱啱三點三趕到，但監製已經唔畀佢跳，話要飛起佢，都幾無辜。
唔罰紅牌大細超
最慘係無綫持雙重標準，陳小春經常遲到，楊千嬅一遲就遲成粒鐘，呢啲大牌就可以當冇事發生過。馮仁昭噚日問過阿Yan嘅經理人公司，佢哋話阿Yan會照舊演出開場同完場，只係因為唔夠時間排舞，所以同無綫方面溝通過，唔想勉強做，怕效果唔好喎。睇嚟佢哋都係怕得罪人先咁講。