Game事撻：PSP搭鏡頭　將惡死女友變小甜甜

一般人只知PSP用嚟打機、上網、睇電影、聽MP3，不過至新玩法係配埋熱辣到港嘅鏡頭仔ChootoShot，令PSP搖身一變成DC同DV，隨街拍攝16:9闊屏電影！再配合附送嘅剪輯軟件，加爆花、心心等貼紙相玩法簡直濕濕碎，直頭幫惡死女友改頭換面，襯番個小甜甜裝自娛吓都仲得！
文：周達之
攝影：何家亮
ImageGirl：Natalie

即拍、即剪、即播

現時附有鏡頭的手提電話通街都係，要拍相片短片話都無咁易，咁PSP鏡頭仔又有何過人之處呢？其實單以鏡頭規格來說，PSP鏡頭仔除了可拍攝Fit晒PSP解像度的480×272闊屏幕影片外，的確同一般的手電鏡頭沒甚麼大分別，但強就強在附送咗對應PSP的剪接軟件，有咗呢套軟件，就可即時為影像添上幾百種抵死過癮嘅視覺效果及聲效配樂。同班Friends一齊玩或者用嚟冧女肯定夠煞食，拍完之後仲可齊齊剪輯加效果，即時重播回味，比起齋拍嘅手電當然好玩好多啦！

■鏡頭連UMD編輯軟件一齊買，剪片毋須靠電腦。

■鏡頭仔可180°反轉，拍人、自拍或高低角度冇難度。

搓圓㩒扁任你玩

PSP鏡頭仔剪輯軟件比起電腦用嘅簡單易用得多，只須喺選單中擇選你鍾意的特別效果，就可以即時加在畫面上。例如倒鏡、打格仔、加畫框、轉色調等，然後配埋背景音樂、拍手聲、槍聲等聲效，全部Effect更超過400種，簡直可以自編自導番套有聲小說，又或MV都仲得！
實地試玩過，最大驚喜係拍攝非常流暢，加上解像度正好Fit番PSP（480×272），即場翻睇簡直就如播UMDMovies咁「高清」！鍾意的話亦可以將段片炒入電腦，擺上網同人分享完全無難度。另外，雖然操作選單大部份係日文，不過所有特效都屬即時顯示，就算唔識㗎文都可意會其作用，小記玩咗十零分鐘已可達「人機合一」，唯一美中不足係不支援中文輸入，想玩貼紙相加字惟有以英文代替。