港股前日急升之後，昨日升勢放慢咗，恒指只升34點，但係成交就有427億元，反映的乜？就係好友控制大局。
中移動（941）繼續做大市「火車頭」，再升0.9%，收報66.50元，啲大行睇80元，有冇呃你，遲吓先知，不過，圖表同成交就肯定冇呃你，睇埋周線圖同月線圖，有可能令你雄心萬丈，需要飲杯凍水cooldown，如果要等中移動顯著回落先買，恐怕機會好細。
至於滙控（005）就回番3個位，報收149.90元，係裂口「陀螺」之後嘅「十字星」形態，呢兩支燭都喺保歷加通道上面，成交縮咗一半有多，係部署裂口炒上嘅形態，下個禮拜應該會有好表現。
地產股前日已異動，昨日炒上，滙控、中移動加埋地產股向好，恒指嘅升勢已經唔係好似之前咁「假」，一直睇淡嘅投資者係咪要改變睇法，自己諗諗。
個市唞一日，但唔係代表個市冇嘢炒，啲國內銀行股就把握機會炒上，成為市場嘅焦點，上市個半月嘅招行（3968）突破咗12.60元，企喺12.62元收市，啲技術指標好醒目，技術形態就話要升，下個禮拜會上試13元，破位就睇14元。
招行C輪9075：招行C輪9075收1.23元，有5個月壽命，溢價4.8%，唔貴，槓桿率10.3倍（有效7倍），輕微價內，對沖值0.68，好好炒，正股升上13元，9075應該靠近1.50元，正股上試14元，隻輪會喺2.20元樓上，呢個價買，正股跌穿12.30元止蝕。
俊樺