殷櫻近日與拍拖三年多的清洪契仔巫雨平分手，男方更馬上與ball后薛芷倫結伴睇演唱會。正值失戀期的她表示如今終於明白男人靠唔住，今後要一改形象收起性感，努力工作靠自己。
殷櫻近日獲無綫安排在遊戲節目《一擲千金》中擔任「千金小姐」，她表示節目錄影以來，最令一眾千金小姐叫苦連天的，是要穿上近五吋的高跟鞋連續站立幾小時，回家後雙腳又紅又腫，她笑言幸好自己有免費美容贊助，趁不用開工的日子馬上為雙腳進行急救。
事業為重
入行多年的殷櫻向來甚少人留意她的工作，反而多姿多采的緋聞一直為人津津樂道，稱得上是電視圈中的緋聞女王。早前她與拍拖三年多的清洪契仔巫雨平分手後，男方馬上與薛芷倫結伴欣賞演唱會。
正值失戀期的殷櫻表示以後會以事業為重，她說：「我其實拍嚟拍去都係嗰個男朋友，都唔明點解會做咗緋聞女王。我個人一拍拖就百分百投入，冇晒心機做嘢，淨係諗住同男友朝夕相對。不過𠵱家發覺男人真係信唔過，以後會努力做嘢靠自己，暫時唔拍拖住。」
扮演妓女
殷櫻又表示為了一改過往予人的形象，決定今後盡量收起性感，她說：「公司叫我做千金小姐，我原本都擔心又要性感，不過知道公司對呢個節目咁重視，同公司商量過之後，佢哋都話冇問題。最近我又拍緊新劇《最美麗的第七天》，喺劇中飾演妓女，同鄭嘉穎係鄰居，好彩都唔使性感打扮，不過我都好希望有機會可以做多啲唔同嘅角色。」
採訪、攝影：卓美娟
場地：beautyforever
