繼續用4場波膽5注出擊博大堆，其中博曼城冧莊，開多次1:0小勝對手波膽，及另兩場1:1和波屬熱門穩陣過關之選，拖場屈福特贏波波膽，發番個小橫財。
曼城前仗被韋根大炒4蛋，上仗即時修正防守問題，擺番個正常啲嘅防線陣容出嚟，即時止血，小勝米杜士堡1:0。其實呢班波防守算唔錯，今輪對榜尾球隊查爾頓，不妨博多次。
米堡遇弱愈弱捧對家
米杜士堡今季已經先後作客輸過畀雷丁及錫菲聯兩支升班馬球隊，今周作客鬥第3支升班馬屈福特，邪起上嚟輸埋都唔奇。事實上，「米堡」今季都係對住強隊打高兩皮，對住弱旅就無料到，今仗實可博較冷嘅屈福特贏波波膽，即管吼屈福特贏2:1。
法甲聯摩納哥今季成為護級分子，真係令人跌眼鏡；周六主場對住啱啱擊敗勁旅馬賽嘅尼斯，摩納哥雖有返回主場作賽之利，照計都未必贏得到呢個士氣如虹對手，博正路波膽1:1最合。
搵多場1:1波膽，博今輪作客嘅西甲球隊皇家蘇斯達，打和主隊利雲特。皇蘇換上新教練路天拿領軍，上仗僅負維拉利爾0:1，今日作客更謹慎應戰下，至少有1分落袋。文︰華度