食日式燒烤，最怕食物燒到亁爭爭，無晒肉汁咬到牙骹軟！走到荃灣新開張嘅「炭火燒」，店員極力推介新款燒烤「霜降燒」，即管order一客燒牛柳。咬一啖，點解凍嘅？燒烤應該係熱辣辣㗎喎！店員解釋，原來霜降燒乃日本傳統燒烤方法，以一熱一凍做出與別不同嘅口感，我嗒多兩啖，肉質果然有入口即溶之感，更難得嘅係夠Juicy。店中另有黃金燒、陶板燒、鬼殼燒等多種燒法，真係有排我試呀！
記者：黃若茵
攝影：陳偉強
模特兒：Joey
霜降燒 鎖住肉汁夠Juicy
荃灣「炭火燒」乃第二分店，旺角總店約半年前開張，今次為新分店開張，特別由日本引入「霜降燒」，連總店都未有得食。「霜降燒」做法非常複雜，先將原條或原塊嘅肉，以炭火燒約20分鐘至外熟內生，離火後立即放入冰水中降溫，再放進急凍櫃急凍約10分鐘，拿出在室溫下解凍後切片就食得。師傅話：「經過一熱一凍嘅處理，可鎖緊大量肉汁，加上用炭火燒溫度溫和，唔怕破壞肉質鮮味，仲多咗層炭燒香，配合外層燒過嘅香脆口感，每啖都有雙重層次感。」
霜降燒牛柳
選用阿根廷牛柳，根部位置較少，真係啖啖肉。蘸柚子燒肉汁，微酸味道更能帶起牛肉鮮味。
霜降燒吞拿魚
吞拿魚係日本飛機貨，夠新鮮。入口聞到陣陣炭燒香味，但可惜肉味較淡，要點多啲汁食先夠味。
霜降燒白肉豚
入口較腍，邊緣位置燒過後好煙韌，口感有點似象拔蚌。白肉豚面有薄薄一層脂肪，燒後好香口。
陶板燒鬼殼燒 加新成員
今次除咗「霜降燒」外，分店亦為「陶板燒」及「鬼殼燒」兩款總店已有嘅傳統燒法加入新菜式。「陶板燒」專為貝殼類海鮮而設，加入的新成員有凡立貝，其燒烤特色在於將肉及殼分開嚟燒，因為連殼燒會阻礙肉質入味，分開燒先夠香。「鬼殼燒」係日本伊勢志摩系嘅燒法中最原始嘅做法，將龍蝦仔拆肉後，用炭火燒到七成熟就灑海鹽，再慢慢燒至熟透。
陶板燒凡立貝
凡立貝係日本飛機貨，燒過後帶有極香元貝味，肉感爽口中帶少許煙韌。
鬼殼燒龍蝦仔
用斤半重嘅本地游水龍蝦燒，加入少許七味粉調味來燒，微辣刺激更惹味。
黃金燒 味濃與海鮮最夾
「黃金燒」乃近年興起嘅燒法，亦係荃灣店獨有，結合日本傳統炭火燒及西式生焗方法。做法是先將肉類以炭燒至八成熟，加入以煙肉、沙律醬、日本燒汁等秘製而成嘅黃金汁，再用爐火將肉烘焗至黃金色。大廚勤哥話「黃金燒」跟海鮮最夾：「因為黃金汁味道濃烈，容易蓋過肉味，所以一定要用新鮮嘅海鮮去做。」為保持海鮮夠鮮味，「黃金燒」每日限量發售，賣晒就無㗎喇！
黃金燒鮑魚仔
鮑魚仔用本地貨，焗過後唔會韌，火候剛剛好。黃金汁味道雖濃，但並未搶過鮑魚嘅鮮甜，配搭得當。
睇埋裝修
搵食攻略
炭火燒（24098686）
地址：荃灣眾安街115至117號地下
營業時間：11:00am-3:00pm、5:00pm-5:00am
交通：荃灣地鐵站A出口
全店座位：80個
人均消費：$100