PS3行貨喺今個月17號見街，水貨仲快，信和、先達Game舖話12號有貨！不過想飲頭啖湯唔易，水貨五、六千蚊入場費唔少得。睇睇網上討論區，有人因為PS3來勢洶洶，開題討論「PS3出咗後，PS2會否好似PS咁沒落？」有位仁兄講，機迷大多「新屎坑」，所以情況同PS2取代PS一樣，預計一年左右PS2就收埋。的確人係貪新忘舊，面對PS3強如電腦，真係好難擺脫其誘惑。不過筆者同部份唱反調嘅網友一樣，認為今次會例外。
先睇PS3第一批貨源極少，炒價勁貴，同步推出嘅遊戲有幾多撐得住揭幕戰，仍屬未知之數。雖知有《高達》、《RR7》等大作，但有網友擔心，正因開發一隻PS3遊戲價值不菲，售價一定喪貴！面對呢部次世代偉大發明，亦冇理由早早決定等玩老翻，玩Cheap自己！也有網民抱觀望態度，覺得要等3至4年PS3先可吸納市場，即PS2仲有3年壽命。以上都係內因，筆者反而覺得有位網友提到：「Wii暫時比PS3佔上風。」呢吓先最要命！Wii售價比PS3平近半，遊戲性強，到時可能唔係PS3令PS2歸隱田園，而係呢位「天」外來客，殺清兩代。哈！今個11月有好戲睇囉。
記者：陸俊雄
http://discuss.com.hk/viewthread.php?tid=2633137