宣萱同馬德鐘噚日凌晨喺中環士丹頓街拍攝無綫新劇《歲月風雲》外景，劇情講述馬德鐘為追求心上人宣萱，不惜使出瞓身三招，包括跪地、捐車底同摸坑渠蓋，目的只係幫對方執番隻耳環。宣萱見堂堂男子漢為自己甘願瞓街，終被打動，兩人情深相擁，之後再手拖手離去，場面溫馨到痹。
索女變椰菜娃娃
畫面拍得動人，不過鏡頭背後就嚇死人，事關馬德鐘似乎欠缺衞生常識，捐完車底再摸坑渠蓋，之後竟然唔洗手就拖宣萱。條街乜嘢細菌都有，真係睇見都牙煙！
至於宣萱，噚日拍攝嗰陣，戴咗個唔係好啱頭形嘅凌亂假髮，搞到成個椰菜娃娃咁，有啲怪相。
無綫台慶頒獎禮就到，今年宣萱遠離爭獎是非，自然成個鬆晒，心情仲好似唔錯㖭，埋位前走去便利店買定一大袋飲品，慰勞工作人員，有劇組人員一邊飲一邊大叫：「宣萱萬歲！」
