「我叫Porn，我老公叫SingThong。」嚟咗香港12年嘅泰籍老闆娘，帶住一臉燦爛笑容用廣東話自我介紹，好切親。舖頭剛開業3個月，開喺舊式大廈內嘅地舖，唔易搵，環境亦非常街坊，Porn係一個老實人，佢話：「我哋舖頭係普普通通，唔可以呃人話係高級，不過食物方面全部都係正宗泰國用料，真係我哋自己落手落腳做㗎！」舖內大小事務都係兩公婆包辦，老公SingThong開舖前喺香辣屋做大廚，Porn自己就喺意粉屋做Pizza，𠵱家就由老公落廚，老婆做甜品、飲品及樓面。二人都有豐富嘅廚房經驗，Porn竟然話：「我老公一直都好想自己開舖，但我唔想㗎，因為我哋中文唔好，唔識同人溝通，好驚做唔到，既然老公想做，我係佢老婆就一定要支持佢。」
老實講，Porn嘅廣東話講得頗流利，一般對話絕對無問題，但寫同睇就唔係好掂，所以餐牌上嘅中文都要靠舊同事幫忙。雖然起初開舖心驚驚，但經過3個月運作，Porn算係食咗粒定心丸，「開舖到𠵱家運作上都OK，無之前咁驚，不過我仲有好多中文唔識講，有時想同客人解釋我哋嘅菜式都有難度。」每日下晝少客時，兩公婆咪偷閒休息，紅日子照樣做生意，都咪話唔辛苦，不過見佢兩夫妻滿足嘅笑容，已知佢哋好幸福。
記者：黃若茵
攝影：伍慶泉
酸甜魚$45
選用鱸魚，起肉後加脆漿炸熟，淋上SingThong自製嘅甜酸汁，入口唔會酸得過份攻鼻，濃度適中。
泰國燒豬骨$48
以鹽、美極等醃足一晚，再用慢火燒20分鐘，令豬肉帶有足夠香味。食時一定要配自家製豬骨汁先夠惹味。
炒蠔仔$45
上碟前於鐵板上抹牛油，未食已聞到勁香。蠔仔其實唔係蠔「仔」，因為勁大隻，蠔味重，老闆娘話一定要點泰式辣醬食。
泰獅子（25977288）
地址：鰂魚涌英皇道1046號益昌大廈A22地舖