祖雲達斯前日對布雷西亞前，搞咗個創會109年慶典，似做騷多個踢波，未開波都好似贏梗嗰隻。果然，布雷西亞食完人蛋糕就要吞雙蛋。祖記8連勝後已升上意乙聯賽榜三甲，提早達成聖誕節前要上三甲嘅目標，準備定升班都冇衰。
類似大場面，喺意乙比賽認真少見。除咗兩個近代10號仔巴治奧、施丹冇畀面出席外，基本上祖記歷代名宿，包括柏天尼都到賀，成棚人切蛋糕，連布雷西亞班主都食埋一份，開開心心開完party至吹雞開波。我求驗客早幾日至講過，啱啱為球會射入200球嘅廸比亞路，入波將會長入長有，話口未完，佢今場開波6分鐘即刻省入一球，然後再傳球波整鬼對方球員擺個烏龍贏2:0。
開季8勝1和無敵手
家陣祖雲達斯開季9場8勝1和，扣埋9分都只係少榜首熱拿亞3分；假如下場作客贏埋拿玻里，真係意乙無敵手。教練廸甘斯季前定下聖誕節前要上前列位置嘅目標，話咁快就搞掂。家陣我求大俠冇嘢驚，至怕班球員贏波後踢得懶懶閒會激嬲對手。好似尼維特臨尾俾對方球員森比利從後攔截，森比利被趕出場，差啲搞寸個party。
咪以為我哋《蘋果波經》變咗祖雲達斯官方報紙，只係祖記話題沒完沒了。相信會方高層同教練廸甘斯應該開始好忙，忙咩？梗係準備定升返班後點招兵買馬啦。