現年21歲的落選港姐徐淑敏（Suki）簽約無綫為經理人後即獲力捧。她近日努力學唱歌跳舞，又謂已向50歲的男友黃重生攞正牌，若劇情需要，她不介意拍性感和親熱戲。至於最想演的劇種，她會選擇悲劇，皆因可喊餐飽發洩。
參選港姐期間，徐淑敏因與現年50歲的黃重生拍拖而被傳媒追訪，成為風頭躉，雖然最後只贏得旅遊大使獎，但是塞翁失馬，焉知非福，選美會過後，無綫立即與她簽了經理人合約，並安排她多項工作。
Suki表示會爭取時間學唱歌、跳舞和駕駛，她坦言：「其實我都覺得好幸運，公司好錫我，所以我要學多啲嘢，雖然考咗車牌未必有錢買車，但如果拍戲有需要，就大派用場喇。」
鍾意喊餐飽
問Suki最想演甚麼角色？她說：「公司畀機會我就做乜都得，我始終係新人，驚做得唔好拖累人，拖慢進度就唔好。」不過她對悲劇情有獨鍾，她說：「我成日睇韓劇，喊一場抒發吓好舒服。」
Suki最想跟哪位男藝人合作？她說：「邊個都冇所謂，只要對手可以帶我入戲就得。」八両金也不介意？Suki答得巧妙：「嘻嘻，等公司安排，我諗公司會幫我搵個同我襯嘅對手。」
如需拍攝親熱鏡頭，Suki可要先徵得男友同意？她說：「要做一個專業藝人，當然要盡量達到導演要求，相信男朋友會尊重我嘅工作，所有朋友都希望我嘅事業有發展。」黃重生會怎樣支持Suki？她補充：「佢精神上支持我就好夠喇。」
採訪：比華利 攝影：林德雄
服裝：PrettyBecky
