著名時裝品牌agnesb.前排開咗間法式餐廳lepaingrille，全城矚目，收到一張贈送的Coupon，即管一試。打電話去訂位，小姐即話：「好Full喎！晚市訂位至12月，午市剛好最後一天還可用到Coupon。」於是約埋朋友仔就去試食午飯。一坐低，想要杯水，等咗15分鐘，口水亁埋都未嚟。落單尚算順利，但係飲咗好幾杯水，等成45分鐘先有第一、二道菜上枱，再等45分鐘先上晒菜，呢餐食咗差唔多3個鐘。可能呢啲就係法國文化，我應該一早預留多啲時間食飯。
至於服務方面，啲侍應唔知係咪因為我用Coupon，總覺得佢對我黑面，無乜禮貌可言。講到食物，老實講係唔差，最滿意都係一碟「白酒煮青口」，白酒加洋葱同忌廉，Creamy又香口，等咗咁耐，總算食到餐美味嘅，但我唔會再用3個鐘去食一餐飯囉！
記者黃若茵
lepaingrille（25772718）
地址：銅鑼灣禮頓道111號地下