正所謂有得玩好過乜都冇，望穿秋水嘅NDS版《Winning》新鮮熱辣見街，由於價錢冇炒味唔少人都趁機入貨，豈料俾班忠實Fans插到阿媽都唔認得，話佢核突肉酸唔過癮！喂大哥，諗都諗到佢一定冇PSP咁靚啦，食「相頭」呢家嘢幾時輪到NDS？不過只要玩多幾鋪，就發現呢班積木人並未至於差到極點，起碼流暢得嚟，仲有插花、倒掛一類嘅過癮動作玩到吖！
文：陳福榮
攝影：譚盈傑
皇馬巴塞用假名
原本以為呢款祖國稱為《勝利十一人》屬濫竽充數，為咗𠵱家大熱嘅NDS市場求其出啲嘢嚟獻世，經過仔細觀察後，發現其實都未至於不堪入目，起碼登場球隊就照住家用版嚟參考；除咗歐美亞洲等列強外，仲有包含咗阿仙奴、曼聯、A米、國米、柏爾瑪、羅馬、拜仁同些路廸呢8隊實名球會，人名與能力跟足真實情況，玩起嚟投入感大增！此外亦有以假名嚟顯示嘅「皇馬」同「巴塞」呢兩支西甲雄獅，有傳基於版權費太過揦脷，廠商不得不放棄塞埋佢哋入隻Game度。話雖如此香港球迷多年來都玩慣假名人，呢點實在唔成大問題。
另外，代理目前只係返咗齋Game來港，畫有花紋嘅黑色主機及網上預訂送嘅靚袋，就只得水貨，有心人不妨昅吓相熟遊戲店遲啲會唔會有貨。
畫面質素達PS級
不嬲都話NDS唔係冇3D機能，只係弱啲咁解啫，因此今次《Winning》決定以全立體示人，唔再係GBA版令人惡心嘅2D平面，都算交足貨。捫心自問，佢嘅3D固然無法跟即將推出嘅PSP版相提並論，但已拍得住PS年代嘅積木人，而且各種動作都由家用機搬過嚟，倒掛插水樣樣有齊，大家畀少少想像力班球員就會似碧咸同細哨㗎喇。亦因為解像度唔夠高嘅先天性死症，隻Game顯示速度唔算好好，所以好容易覺得望起嚟窒窒哋，令稍有要求嘅人即時卻步。
扭蛋買人搵勁嘢
雖然NDS版《Winning》並無最吸引嘅MasterLeague模式（育成），但都設有耐玩性勁強嘅WorldTour，畀你用隊垃圾球員挑戰全球勁人。班廢柴假名人即係過往ML嗰陣嘅「地莊」，玩家要由最底層賽區將拉脫維亞同沙特亞拉伯等弱旅逐一擊破，然後逐層打上去直至巴西荷蘭等冠軍球隊為止。過程中贏波就會得到金銀代幣，藉以擰部扭蛋機將啲手下敗將據為己有！但由於贏每場波都只會送一個代幣，抽到咩球員仲係Random決定，有機會抽到重複球員，所以難度遠較家用版直接用分買高好多。亦因為咁，佢容許玩家連線換人，咁就唔使嘥咗用唔着嘅人啦。
此外，仲可一餅帶兩個人打，容許玩家以DownloadPlay進行Wi-Fi對戰，更能夠透過WFC上網搵其他人互片。據知香港同區連線流暢度唔錯，𠵱家唔少人都玩得不亦樂乎。至於連去日本效果就真係爭咁啲，唔多順之餘仲會隨時甩線。
機舖搵人試
陳生：「未至於好差嘅，畫面冇PSP咁靚，但都算幾卡通幾Q。操控一般啦，遊戲模式麻麻哋，呢個價錢叫做OK。」
鄭生：「啲掣同家用版幾乎一樣，一坐低就識玩，唔使煩。但畫面真係唔多掂，兼且有啲窒，僅僅合格囉。」
機迷狂踩 波友大讚
喺呢隻NDS《Winning》推出之後，小記發現網上有唔少玩家對佢給予劣評，話畫面唔掂控制唔聽使，有啲仲誇張到叫人咪買等插水價。不過對於唔算超忠實Fans嘅我嚟講，佢又未至於一文不值，起碼玩上手都叫有系列一貫感覺，加埋有別於過往MasterLeague嘅儲人系統同埋對應WFC（連線），搵佢嚟過吓手癮都收貨有餘。
另外為咗了解其他人對佢嘅感覺，我特登走去街機版《Winning》勝地之一嘅聯合機舖，睇吓班白領係咪勁唔Buy佢，點知發現佢哋又唔算好抗拒，仲話兩百鬆啲幾抵玩喎。不過大部份被訪者都唔願意出鏡，唔通佢哋只係趁Lunch落嚟唞吓，費事畀老細誤會嚟蛇王？
特別版反而炒起
PROFILE
遊戲類型：足球
對應機種：NDS/NDSLite
遊玩人數：1至2人（支援網絡對戰）
開發廠商：KONAMI
售賣點：I-Gamer（27253338）
售價：約$198
(C)2006KonamiDigitalEntertainmentCo.,Ltd
