今期投資特攻隊終於輪到我賴恩為大家推介心頭好喇！今次所推介賽事嘅大藍籌係屬於西甲賽事，熱捧「黃色潛艇」維拉利爾主場擊退貝廸斯；至於2、3線股嘅冷選就揀咗韋根作客保頓成功搶分而回！文：賴恩
老實講，維拉利爾上季嘅表現真係好令筆者失望，不過考慮到佢哋要同時兼顧聯賽同埋歐冠盃，以佢哋有限嘅兵源，搞到兩頭唔到岸自然係意料中事；反而今季「黃色潛艇」只係專攻聯賽，或者因為甚少直播關係，所以無乜人留意到佢哋嘅表現，但實際上佢哋喺度默默起革命。
默默起革命追貼前3位
𠵱家維拉利爾落後前3位嘅巴塞、西維爾同埋皇馬7分、6分同5分，但呢3隊都要兼顧歐洲賽，所以佢哋喺西甲聯絕對唔係冇機會。睇番𠵱家同佢哋一齊喺中游嘅球隊，以維拉利爾嘅人腳，起碼都拍得住前列嘅西維爾同埋華倫西亞，開「咧」時仲畀足智彩列為第4奪標熱門；足智彩係大莊家，我唔相信佢哋會跌眼鏡囉！
再睇番維拉利爾今季嘅表現，除咗開季頭3場未進入作戰狀態之外，近5場比賽錄得3勝2和，佢哋近期嘅表現絕對喺聯賽中數一數二；另外，佢哋前鋒科蘭今季似乎回復射手本色，目前已經入咗3個波。
貝廸斯樹倒猢猻散
貝廸斯開「咧」至今，喺聯賽已經輸咗6場；近5場更加入得兩球失7球，維拉利爾仲唔襯佢病攞佢命咩！攻不強守不穩正係貝廸斯嘅致命傷，而且佢哋今季「讓球」盤路甚差，不論係「讓波」抑或「受讓」都傷透捧場客嘅心。貝廸斯成績急速下滑，同祖亞昆離隊有關，搞到班波群龍無首。所謂「蛇無頭不行」，有祖亞昆離隊但有加入咗多名新兵如德國國腳奧當高等，球隊當然需要時間重新適應磨合，成績自然滑落。
冷選方面，新敗嘅保頓今次雖然再次主場出擊，不過輸畀曼聯0:4對軍心肯定造成一定打擊。雖然韋根無咗上季神奇球隊嘅精采發揮，但喺前鋒希斯基來投之後，成隊波反而變得更有份量，而且佢拍檔亨利卡馬拉亦愈打愈好，有權喺銳步球場攞分。
投資特攻隊金句
貝廸斯呢排異常低沉，而且球隊至今依然未能搵到「反底」板斧，雖然之前往績同維拉利爾拉成均勢，不過今時唔同往日，依家嘅貝廸斯就好似一隻「折翼老鷹」，難於遨遊天際。