有時睇娛樂名人版，見到一啲公子晚晚蒲吧，倫敦巴黎東京有大騷，佢哋與女伴飛過去捧場，康城影展，又見佢哋現身。唔講錢嘞，淨係講時間，點解啲公子咁得閒嘅？佢哋唔使做事嘅咩？冇工做呀？
呢日在港麗酒店食飯，主人家鍾意講完財經、政治之後，就講吓飲飲食食、名人八卦，於是向佢請教：「點解啲公子有咁多時間？你係富翁級吖，使錢冇計，但你只係一年放三至四個星期假啫，平時好鬼忙㗎？」呢位富翁F回答：「點同呢，我係第二代，父親留低一盤生意畀我，我夠運，將生意發大，但仲係冇法子同啲大富豪比。話你知，好多大富豪家族去到第三代，家族資產統統歸入信託基金，子姪唔使理。信託基金向有資格之子孫發放固定生活費，譬如幾十萬一個月咁啦，另外每人配給一架名車，一個司機、一張信用卡（額度係秘密）。係咁多嘞，所以佢哋啲公子使乜做啫，每日嘆世界咪得囉，唔去晚晚玩，已經算係有節制。」
旁邊之富翁L加多一句：「唔係唔使做，太公驚住子孫敗家，所以在基金條款中加多一項，唔准子孫做生意。」唔怪得之啦，咁就仲名正言順去玩到夠㖭。
富翁F話：「坦白講，一啲公子係比你左丁山有錢好多，但並非有錢到可以同當紅大財團比，甚至好多打工皇帝，投資銀行家都比啲公子多錢。名女人搵佢哋照顧，不可期望過高，以為攬住條大水喉。」
現代興起家族信託基金，只要家族內人士循規蹈矩，確可富過三代。但係咁噃，賴以維持家族和氣嘅，除咗性情，就係銀紙，如果信託基金持有之物業、股票，企業一旦失去穩定之現金流，派唔到息，弊咯。有例子㗎，福特家族持大股嘅福特汽車今年派唔到息，成個福特家族突然冇咗現金收入，你話點樣適應？想落都係畢菲特蓋茨啱，自己賺，自己捐晒，不為後代生活勞心。