田溯寧今年5月突然辭退網通首席營運官一職，走去成立中國寬帶產業基金，佢噚日披露咗未來發展大計。身為基金主席嘅田溯寧介紹，至今年底中國嘅手機用戶將達5億，寬頻用戶7500萬個，而固網用戶約4000萬個，喺中央計劃經濟下，好有效率咁建設咗覆蓋全國嘅光纖網絡，令中國成為資訊經濟大國。
不過，𠵱家喺美國納斯達克上市嘅中國資訊科技企業只有15家，而且合起嚟市值只有2、3億美金，相當於雅虎2%，佢深信未來20年，中國市場足夠培育一個全球最大嘅資訊科技公司，無論係嚟自國企定係年輕企業家。
佢預見未來嘅寬頻行業將有巨大機會，而左右呢個行業發展有四大力量，包括監管機構、電訊營運商、企業同國際資訊科技商，如雅虎同Google等。