一網股事:中燃見回吐就上車

一網股事:中燃見回吐就上車

中國燃氣(384)今年2月頭由1.75元高位回落,6月跌到1.14元後企穩,近排持續反彈,成交明顯增多,噚日更一度升至1.40元,為5月中以嚟最高,收市回至1.38元,仍升1仙,網上又見散戶談論呢隻股。
《香港討論區》內上咗車嘅cchan212問:「我1.34買咗,有冇人可以幫我分析吓呢?」
StephenHawking雖然冇貨喺手,但仍然熱心畀意見:「小弟冇買,但都成日留意,呢隻係好股,可以長期持有。公用股升得慢但好穩陣,中國市場大,發展潛力好大。」
kikikiss100就冇咁好耐性:「悶到嘔,1.24入,1.27悶走咗……but中長線看好的!Goodluck!」
cchan212回應:「其實我預咗係長線嘅,我覺得佢風險唔係太大先買。呢排見成交多咗,希望佢會升啦!」

唔憂冇生意

中燃主業係買賣天然氣同建造燃氣管道,另涉及證券投資、物業投資、提供管理服務同物業發展。講中燃唔可以唔講佢嘅背景,有跟開呢隻股嘅,都知佢背後大股東粒粒巨星,包括隸屬中國國務院嘅海峽金融、中石化(386)、印度政府旗下最大石油公司GAIL、阿曼政府控制嘅OmanOil,仲有亞洲開發銀行。再加埋祖國計劃喺2010年前,積極提高天然氣喺能源結構中嘅比重,中燃唔憂冇生意。
技術走勢方面,隻股6月1日跌到1.14元低位後反彈,過去5個月形成平衡上升通道,噚日升到通道頂遇阻回落,但其他技術指標仍然向好,包括MACD呈雙牛訊號,RSI亦現強勢;加上近5個月反彈浪底一個高過一個,每次反彈時成交增多,整固時成交減少,反映買盤甚強,短期如見回吐,可中線買入,一旦升破上升通道頂阻力1.40元,下一目標睇1.60元,以上周浪底1.31元作止蝕。
余文