美國上季經濟增長只得1.6%，係3年半以嚟最弱，較今年首季的5.6%慢得多。經濟咁「泅油」，究竟會唔會愈嚟愈衰？
喺《MSNBC》討論區，網友enigma53話，美國經濟仲有排捱，現時只係經濟放緩嘅第一期，病徵係人人唔願買樓。進入第二期，隨住樓宇浮動按揭利率上調，業主會劈價求售。到第三期，多數人發覺經濟有問題，會節衣縮食。而第四期，企業生意會減少，並加快裁員。去到第五期（估計係出年首季結束時），聯邦儲備局為刺激消費同埋就業市道，會開始減息。
Nick100大歎搵工難，佢話：「對於嗰啲冇工開或就業不足嘅人嚟講，美國經濟確係好差；面對樓按浮息開始調升，美國人如果想買樓，就要先搵份好工。我今年五十幾歲，四年嚟都嚴重開工不足。我認為銀行應盡快減息，等人更易供樓，否則銀主盤會湧現。」
仲有大把機會發達
不過，dembaby認為美國經濟亦有好嘅一面，佢講：「美國人搵工唔算太難，如果冇人請，咪做生意囉，可以做園藝、化妝，或寵物美容等小生意。若果用屋企嚟做寫字樓，更可獲減稅。唔好淨係倚賴政府救濟，要自力更生，好似我咁，我努力做嘢，已經買咗第二層樓嚟收租。美國其實有大把發達機會。」