噚日，孫柏文聽到我哋特區司長許仕仁講話我哋特區嘅股票市場，今年公司新上市集資金額已超越紐約。雖然唔知道許司長講呢番說話嘅態度係點，不過以我哋特區政府一向好大喜功、為求連任「冇寶不落」嘅心態，你哋話呢？哈、哈！
雖然我唔能夠解讀我哋特區官員態度嘅第一手資料，不過遠在花旗國紐約，紐約市市長Bloomberg同代表紐約州參議院嘅議員ChuckSchumer，就喺《華爾街日報》一篇題為《拯救紐約，要學倫敦》嘅文章講同一樣嘢。當然，兩位代表被超越嘅股票市場寫文，文中嘅態度，可以算是大家心目中司長許仕仁態度嘅相反。
如果大家有機會睇吓兩位花旗國「政治家」聯署寫嘅文章，應該都會同我一樣覺得佢哋對花旗國總體金融市場憂心忡忡。無他嘅，事實上喺05年，24間最大型新公司上市集資裏面，得一間公司喺紐約上，到今年，我哋特區集資金額都真係超越紐約。不過講真，司長許仕仁話我哋特區集資金額超越紐約，就好似一個矮仔指住一個啱啱被斬去雙腿嘅高佬話：「哈、哈！今年我卒之高過你。」
大家可能會問：「點解孫柏文要將紐約被喻為一個被斬去雙腿嘅高佬？」其實，花旗國人民好多時面對醜聞或重大問題嘅時候，都會要求政府好「嚴厲」咁「做啲嘢」。正當人民有這樣要求，花旗國作為一個民主社會，佢哋嘅立法機關代表當然會「順應民意」去「做啲嘢」，通過法例去希望可以杜絕醜聞再次發生。不過，好多時候花旗國立法機關通過嘅法例，會去得太盡，形成一個「斬大髀、避沙蟲」嘅情況。
喺02年，花旗國人民經過Enron突然執笠嘅痛苦經驗洗禮之後，國會亦隨即通過Sarbanes-Oxley（簡稱為Sarbox）嘅法例，希望可以杜絕未來再有Enron嘅出現。Sarbox呢條法例最厲害嘅地方，就係如果上市公司有乜風吹草動，會令到上市公司高層「GoToJail」。
以前，上市公司年報中嘅會計出錯，好多時候只需要從民事訴訟賠錢，就可以被擺平。不過有咗Sarbox之後，如果上市公司會計出錯，公司高層就要負上刑事責任，隨時會鋃鐺入獄，刑期分分鐘長過殺人犯。有咁樣「下屬出錯、你要坐監」嘅法例，又邊度會有公司想喺花旗國上市？
股票市場最終係一個資金集散地，對於資金充裕嘅人可以尋找更高回報，而需要資金嘅人亦可集資，你情我願、你賣我買。Sarbox呢類法例，話「保護」投資者，不過因嚇怕好多企業唔上市，最終投資者嘅選擇少咗，回報率都會相繼降低。最終受害者就係原先想保護嘅一群。我哋特區咁樣贏人，實在太可悲！