香港人食嘢愈來愈注重健康，尤以貪靚嘅女士更甚，為免增磅，order菜時都特別叫廚師「少鹽少油」。湯盈盈都係追求健康一族，不過佢唔係「少鹽少油」，而係「走白飯」，改食紅米同野米，佢仲話：「食完之後，去廁所都暢快啲呀！」
記者：蘇振鵬
攝影：伍慶泉
Hair：FrancoNg（PrivateISalonI.F.C） Wardrobe：breadnbutter
食紅米如廁暢快啲
盈盈嘅屋企人係開餐館，平時佢自己都成日入廚，一來享受煮嘢食嘅過程，二來自己煮又會健康啲。注重健康嘅佢，原來喺三個月前仲戒食白米：「我睇書話澱粉質類食物好似白米同白麵包等，喺製造過程抽走晒對身體有益嘅營養，所以我就唔食白米，轉食紅米、野米同五穀米喇！因為佢哋嘅表層含有胚芽，好有營養，又含豐富纖維，長期食用有助降低膽固醇。我食咗一陣就見效，去廁所Regular啲，仲好順暢好快搞掂！你都試吓啦！」不過紅米嘅味道冇白米咁好喎，唔難食咩？「又唔會喎，我覺得煙煙韌韌幾好𡁻呀。最初介紹爹哋食，佢好怕食，不過食多幾餐都接受到。」
Lime專煮紅米野米
由於盈盈多數自己入廚，出去食嘢都係朋友介紹：「之前同朋友上過嚟Lime幾次，覺得呢度坐得幾舒服。加上呢度煮餸時用欖橄油烹調，又有紅米同野米供應，Fit我。」Lime全名係Lime@T5Sportscafe，開業年半，佢不但以健康菜作主打，仲全店禁煙，比政府早行一步。法籍廚師Peirre話：「我哋提供紅米及野米兩種，想推介畀食客知食呢啲米係好有益。」但為何會揀選喺旺角區開舖呢？「為了配合公司喺旺角區銷售運動用品，提供一站式運動及飲食服務。最重要是希望食客出街用膳時都食得好健康。」態度正確！以後落Order時唔使再話「少鹽少油」啦！
1.奧米加-3挪威三文魚他他配紅飯（$88跟餐）
廚師將新鮮的三文魚切成小粒，以橄欖油、醃菜、亁葱、蒔蘿草、香葱及檸檬汁作調味。盈盈話三文魚嘅Omega-3有助降膽固醇。
2.雞胸釀芝士伴蘑菇汁配紅飯（$78跟餐）
雞胸裏面已經釀入新鮮馬蘇里拉芝士，再加入蘑菇和亁葱，以細慢火煎香。離火後，將多餘油份取出，配以白酒，最後加入少許低脂奶油打成芡汁。
3.澳洲海鱸伴橄欖香草汁配紅飯（$88跟餐）
這道菜的做法是先將海鱸向魚皮的一面用慢火煎至熟透，混以亁葱、黑橄欖、羅勒及番茄，加入橄欖油煮成香草醬汁。
4.法國香煎鴨胸伴香橙薑汁（$88跟餐）
入口幾重橙味，但不會搶去鴨胸味，先甜後鹹夾得啱啱好。」廚師將鴨胸亁煎逼出多餘油份，再將鑊內的焦物放入橙汁和薑粒煮成香橙薑汁，難怪兩者味道咁夾。
5.南瓜蔬菜炒高纖紅飯($58跟餐)
這菜式專為素食者而設，以南瓜為主，加入不同蔬菜。雖然係全齋冇肉，但南瓜不會太腍，食落幾有口感，而且炒過的紅米都幾香口，就算唔食齋都會鍾意食。
食客都叫好
睇埋環境
搵食攻略
Lime@T5Sportscafe（23885405）
地點：旺角花園街76A「T5」2樓（多倫多Nike專門店樓上）
交通：旺角地鐵站E2出口直行
營業時間：星期一至日11:30am至12:00mn
座位：約90個
最好賣：沙律、扒類、橄欖意粉系列、高纖紅飯及黑野米系列
備註：所有晚餐配是日新鮮蔬菜餐湯，配自選白飯、法國高纖紅飯、美國黑野米、意大利粗麥餅，另加錢可配餐飲。收現金及信用卡，設加一，平均消費$110。
紅米野米有幾健康？
紅米含有豐富維他命A、B6及C；野米就含有豐富菸酸、維他命同優質蛋白質，而且纖維含量較高。最緊要係兩種米由種植到儲存都沒有使用任何殺蟲劑、化學劑，食咗又幫助消化。
而餐廳Lime採用的米，一款係來自法國南部卡馬格的紅米，含高食用纖維。而野米則來自美國，在清澈及水溫較冷的湖內生長，沒有任何基因改造成份，屬全天然的食米。話晒係鎮店之寶，所以不會出售，想食就要到餐廳幫襯。
