港股昨日再創新高，恒指收市進賬129點，高企18453，18450關呢個關鍵位穿咗，好友應該唔會客氣，繼續向上進攻。
大市成交縮咗，但係氣氛就冇差到，一則啲國企股繼續反彈，H指仲上番10日線樓上，MACD扭轉向淡走勢，炒家啲信心自然增強，二則大市炒上，係由滙控（005）帶動，大家都知滙控係港股嘅靈魂，即使只係升一兩元，啲投資者都會好大反應，昨日滙控就升咗1.90元收市，報收148.70元，中段仲創咗148.90元新高價。
個市一路上嚟，唔係炒中移動（941）就係炒滙控，道理好簡單，因為佢哋佔恒指嘅比重大，加埋啲地產股一路都唔生性，於是乎就出現輪流炒兩隻重磅股嘅場面，𠵱家隻滙控郁咗上嚟，中移動會唞唞先，昨日已作預告，滙控升破147.50元收市，可以揸番啲滙控C輪。
滙控C輪4864：滙控升到嚟呢個價，好大機會會試150元，150元只係個心理關口，實際嘅阻力唔會好大，股價升到152元，相信先至會有較大嘅沽壓，破咗位就炒上去154元嗰頭。
滙控C輪4864昨日報收47.5仙，仲有70日壽命，溢價1.4%，好抵，行使價146元，屬輕微價內，正股突破150元，跟炒盤料會大幅增加，睇吓啲街貨量同埋引伸波幅上升就知道乜嘢事，槓桿31.3倍（有效19.7倍），對沖值0.63，隨住正股炒上，對沖值會發揮更大嘅效用，正股升152元，4864應該會升到70仙樓上，就算去到150元有些少阻力，隻輪都應該已經升到56仙，破咗152元就梗係升得仲勁，現價買番啲，正股跌穿147.60元沽出止蝕。
俊樺