國泰行政總裁陳南祿，噚日都有出席香港專業管理協會個研討會，輪到佢上台嗰陣，佢乘機反駁外界話國泰機票貴嘅言論，仲提咗個嶄新得嚟又有趣嘅論據。
佢話搭地鐵由尖沙嘴去金鐘，只係1000米路程，地鐵收費成9蚊，相較國泰同樣飛行1000米嘅航程，收費只係25仙，仲有佳餚美酒奉上，地鐵貴國泰成40倍，仲唔俾人食自備嘅食物㖭！
跟住，佢回想起03年面對「沙士」惡境，嗰時試過飛去台北嘅班機係零乘客，國泰靠同員工互相扶持先至度過難關，要求員工放三星期無薪假期，佢哋都接受。到年底情況好轉後，公司補番呢三星期嘅薪水畀員工，佢哋變相多咗三周假期。所以佢話，人係公司最重要嘅資產，要珍惜。