霍英東逝世，各報對佢嘅讚譽，鋪天蓋地而來，一時之間，睇都睇唔晒。十月三十日《明報》有一段報道話霍英東比較年輕時鍾意踢足球，成立一隊小型球隊叫做「友榮」，以佢間公司「友榮」為名。𠵱家啲記者、編輯真係年輕，霍先生踢波之時，佢哋仲未出世，但都應該仄吓霍先生間公司係叫做「有榮」，唔係「友榮」吖。
老編輯T年輕時亦喜歡踢小型球，睇過「有榮」在修頓、麥花臣比賽，左丁山余生也晚，唔多記得，但先父係麥花臣球場擁躉，晚晚放工之後就到麥花臣睇波，六十年代之「九龍盃」，轟動一時，凡有比賽麥花臣球場必定爆棚，除「九龍盃」外，但凡「有榮」到麥花臣踢波，亦一定哄動，因為霍英東落場，一定有甲組大牌球星陪伴左右，最出名嘅就係姚卓然，當時最大牌之球星，綽號「小黑」，別號「香港之寶」。小黑大玩左插花、右插花、盤球扭波如朗拿甸奴，扭空晒入到九碼區，就橫傳畀霍老闆一腳抽入，全場拍掌！霍生當時年近四十，踢波有型有款，冇對方後衞敢撞佢踢佢。
「有榮」小球隊稱譽小型球圈多年，及至霍生年紀漸大，不宜跑上跑落，改去中華遊樂會與何鴻燊打網球，「有榮」球隊就在球場失蹤。霍生想話入主南華體育會，做足球部主任，但南華班元老知道佢係知名左派，韓戰期間走私軍用物資入大陸，一於排斥之，唔俾佢入主足球部。今日睇起嚟，好似匪夷所思，當年就係高度政治正確嘅決定，得港英政府歡心。
歷史對人物之定論，隨時勢不同而演變，昔日狗熊，可能係今日英雄，反之亦然。一九七五年之姚文元、王洪文，紅嘞啩？一九七六年之姚文元、王洪文就係國賊。霍英東之可敬處，就係始終如一，一九五六年與二○○六年都一樣立場。今日之忽然愛國者，見到五星旗流淚者，猛咁讚霍先生愛國、偉大，唔知羞唔羞，三十年前，佢哋邊度敢同霍先生來往呀！不過現實世界就係咁，識時務者為俊傑。