大家有冇留意玖龍紙業（2689）噚日創咗新高？嘭嘭聲升穿10元去到10.42元，令到唔少基金經理跌爛眼鏡。喺股價創新高咁開心之際，華華收到風，玖紙噚日向三名董事授予購股權，以肯定3名董事嘅貢獻。
呢三位咪係「紙品女王」玖紙董事長張茵、佢老公兼集團CEO劉名中，同埋女王嘅細佬兼執董張成飛囉！華華聽到話呢批購股權每股認購價為9.8365元，較噚日收市價有5.6%折讓，三人總共可認購1.245億股股份，佔已發行股本3%。
呢個購股權有個特別嘅條件，若果三位董事想行使，必須喺未來5年，將玖紙純利維持高於05至06年度13.7億元人民幣嘅35%或以上，有關購股權將分5年派畀佢哋。照咁睇，女王應該對玖紙前景充滿信心，唔怪得噚日股價咁靚！