港股氣勢仍盛，上周五單日轉向後，又連升兩日，恒指再創新高，成交雖然減少，但仍有387億元，入市資金源源不絕。大市上到18500水平，係預測大升浪嘅第1站，短期市勢將會進入整固期，在18000至18600水平上落。
鋼鐵價格反彈，鋼鐵股有追捧，最突出係盈利大增嘅鞍鋼（347），搶上8.35元收市，升5%；由9月的6.07元低位起計，鞍鋼已累升37.5%。另外，馬鋼（323）期內亦由2.41元升上3.10元，升28.6%；中國特鋼（2889）由1.13元升上1.37元，升21.2%。
特鋼「晒士」細，同鞍鋼、馬鋼呢一類大隻佬自然冇得比，但睇佢個勢，亦已接近作動邊緣，一穿位而上，就會爆升。
特鋼由10月初的低位1.13元起步，一度升上1.51元，之後出現調整，形成上升三角形，噚日成交已縮到250多萬股，而股價仍守穩在3條平均線之上，整固隨時完成，衝破1.40元阻力，照度上去，短期上升目標係1.80元。
大行睇番好資源股，瑞銀證券上月初已叫增持，麥格理更給予中國特鋼「優於大市」投資評級，目標價1.96元。
集團主要生產軸承鋼（約佔90%）、彈簧鋼、碳結構鋼及齒輪鋼等，在中國特殊鋼行業已取得領導地位，最近更與國際知名的特種冶煉技術諮詢公司達成協議，由該公司提供專家擔任技術顧問，將集團軸承鋼品質提升至世界級水平。
鋼價回升業績可改善
向洛陽安龍鋼鐵注資已完成，提升產能後，特殊鋼及鐵設計產能可由50元公噸及40萬公噸，分別提升至80萬公噸及70萬公噸，營運及保養成本可降低。
06年度（12月年結）中期盈利減少29%，主要係集團曾有一段時間停產，上市後行政費用大增，以及稅免優惠終止所致。由於鋼價持續回升，加上銷售增加，預期全年盈利1.1億元，每股盈利約20仙，現價PE唔夠7倍，追落後，有概念。
郭兆誠