《香港討論區》昨日有傳大戶會以程式盤沽期指，試圖推低港股，但事實上恒指收市升近130點，謠言不攻自破。大多數網友認為跌市根本冇可能發生，假若中移動（941）升勢放緩，滙控（005）大可取代其「領軍」地位，接力托高恒指。網友tamtak更稱，即使大摩想沽貨推低恒指，其他基金大戶都會喺市場上接貨，所以港股想跌都幾難。
想捉路睇中移動升幅
港股創新高，噚日幾乎又發生殺熊事件，網友起初以為恒指會升破18500點，而相關嘅三隻熊證就被強制收回，豈料恒指高見18495點之後便掉頭回落，令不少想睇「殺熊記」嘅網友大失所望。網友egsimon話：「都唔知大戶想點，只差5點都唔推上去，殺晒三隻熊仔。」網友塔利斑戰士稱：「大戶又縮沙，差5點都唔殺熊。」而網友狗籠屎業更指：「每次殺熊都係殺完才掉頭落番，今次竟然唔殺！獵人轉了性？」雖然係咁，大多數人相信，現時三隻熊證就像獵人用大火力槍炮指住，隨時冇命，所以呼籲不要買沽輪，更不要買熊證。
至於大市未來走勢，根據討論區內嘅調查，50%網友認為11月恒指會企穩18000點或以上，21.4%網友相信會徘徊17000至18000點，只有少數人睇會跌破17000點。網友double2317話：「想知大市未來去向，最佳方法是睇中移動嘅升幅如何，如果佢升得多，恒指自然會被推高。」
不過，另有網友指，假如佢跌至50元，恒指最少要跌800點，還未計入其他連鎖效應，由此可見中移動嘅重要性。