呢世人最唔抵得蛋撻同奶茶香，是值下晝3點幾、啱啱放低飯碗行經先達「背脊」，發現蘭亭咖啡閣，門口放咗黃澄澄出爐蛋撻，眼見酥皮有如牡丹怒放、蛋漿則水凝油潤，馬上肥彭上身！
老闆唐先生斯文又健談：「旺角自己有爐做包嘅冰室，只係剩番我哋呢間；人工、地方、皮費貴！好多餐廳冰室都轉為攞現成貨，蘭亭閣已經40年歷史，我哋對冰室嘅傳統同食物出品都有一份堅持。」由清晨6點至晚上7點收舖，喺度都可以食到辣口出爐蛋撻：「蛋撻唔新鮮真係唔好食！我哋每次只出一盤（3打），差唔多賣晒又即做，所以幾時嚟都有出爐蛋撻賣！」
望望餐牌，黑牛梳打、雪糕新地、蝴蝶餅！木樓梯行得格格響、生鐵鑄造枱櫈、開放式水吧、奶茶咖啡滿室飄香，60年代懷古滿到瀉！其實唐老闆是蘭亭閣第二代掌門，「親戚年紀大，頂下來就要保持原有風味；但做落先發覺經營運作頗吃力，於是叫當時做秘書的太太幫手，一做就是十多年。」兩夫妻一早一晚各自返一更，見得少會唔會影響感情啊？「一做下來，我哋已堅持收7點，就是為有點私人空間，逛逛街食個飯！有時諗到賺錢之餘，都要有點私人空間！」「不過近年香港人生活節奏愈漸推夜，正是愈夜愈精釆，可能不久將來都要考慮開埋夜市囉！」記者：朱崇德 攝影：何家亮
菠蘿油+熱奶茶$13
壓扁嘅菠蘿油有一股說不出誘惑，皮、包唔會散開，食落有口感，後生一輩講都唔明。
洋葱豬扒飯+熱飲（$25）
都係呢度招牌菜，新鮮洋葱及番茄煮成，扒身一坑坑，即叫即做，同一般快餐店冇得比。
蘭亭咖啡閣（23947163）
地址：旺角花園街114號地下閣樓
