今次到西班牙巴塞隆拿試07年新MiniCooperS，任揸任玩，山路Highway都閒閒哋，新引擎係寶馬車廠同PSA集團引以為傲嘅結晶品，我唔搵條筆直公路同迂迴山路，又點可以試到底？由於太過興奮咁「寰宇風情」，響Day2嘅山路上飆到迷咗路，但MINI太好玩，令搵路都成樂趣！
記者、攝影：黃婉冰
Day1 爭住玩新車
起點Castelldefels 幾十部MINI排隊出場
車廂有新意
坐完十幾個鐘頭飛機，去到Castelldefels嘅OlimpicdeCatalunya車廠，就係為咗試試最新嘅MINICooperS。有幾十部新款Mini，陣容強到嚇咗我一跳！今次傳媒可以利用兩日時間試勻普通版同Sport版，兩者分別只在於車廂裝飾和懸掛，馬力和性能一樣。
跳上車，好似玩十個唔同錯處嘅遊戲，搵吓新舊兩代有咩唔同，最明顯係皮椅，黑色皮包杏色邊，感覺好Classic。中控台驟眼睇同上一代分別唔大，大個鋁合金圓形錶板，再落係電窗、冷氣開關，再細望，錶板比舊款多了資料顯示，日期、時間、油缸顯示、音響按鈕一應俱全。雖然資料多咗，但整個中控台卻比以前窄，所以造就了前座司機、乘客位腳部空間較大，車廠又強調車身做過「加長手術」，但後座依然未見有改進，嘥都係咁話，都係用嚟放袋啱啲。
OlimpicdeCatalunya
直路就加速波波盡
檢查完畢，開車由OlimpicdeCatalunya出發，我揀咗可以作加速測試嘅大直路，一般車行要個半鐘，但新CooperS唔使一粒鐘就搞掂。一開車已經感受到新車最大改變，起步較爽快，呢點不得不歸功於廠方將扭力提升，只要試過上一代CooperS，不難發現呢個咁明顯嘅改變。在又闊又長又少車嘅公路，唔飛就假。新車棄用CVT波箱，所以1波、2波、3波……用盡6個波，一條直路任飛。新車懸掛同避震都調校得比以前軟，唔使再集中心神去操控，一路行一路欣賞沿途風景，耐唔耐享受隔籬車司機、乘客嘅艷羨目光，幾Enjoy。果然唔使1個鐘，已經返到位於ElVendrellru嘅五星級酒店HotelRA！
DAY2 Valls 玩火紅跑版
Valls跑山路
第二日輪到試跑版CooperS，今次試嘅路程比較多山路，我心諗：「仲好，可以名正言順用跑版劈山路」。
未試之前已經知道Sport版刻意將避震Set得較硬，所以先做好心理準備（只差在未帶埋嘔吐袋上車），上車前循例睇睇Sport版同齋版有咩唔同，座椅用布同皮玩撞色，胎軨款式較跑格，就此而已，車內櫳用上紅×黑撞色設計，望落姣得嚟幾有賽車格，就算男仔揸都唔怕好礙眼。
終點 Montblanc山路
玩到迷路
響近Montblanc嘅山路用200km/h直闖，先在又窄又短嘅住宅區穿插，駛入山路後，見路即劈。出彎入直路，「咦，你睇吓，已經去到200km/h。」由於玩得太興奮，竟然迷咗路，但搵路時仍興奮咁四圍劈彎，激「搵」兩個鐘，最後由Bearcelona嘅A2Highway向山路離開，試車迷路可以咁開心，都係第一次。新MINI高速入彎亦唔覺好飄，Sport版懸掛較硬淨，就算突然要轉入某一個路口，都唔會有失控嘅情況，感覺又穩又舒服，迷路試車再一次證明，新一代避震果然大有進步，當然，亦要多得西班牙交通條例寬鬆，喺無快相機監視嘅情形之下，先可以盡情咁試。
MiniCooperSSpecifications
引擎：1,598c.c.
直4DOHC
馬力：175hp/5,500rpm
扭力：24.5kgm/1,600rpm
傳動：6前速棍波
車價：待定
車輛提供：
MINIHongKong
（28366289）
