鍾鎮濤（阿B）解除破產令後，近日忙於錄音出碟同籌備農曆新年喺紅館演出嘅「溫拿好時光演唱會」，噚日佢就喺紅磡出席由佢做代言人嘅瑞士依波路錶廣告記者會，女友范姜同另一代言人趙雅芝都有到場，同場仲有應屆中華小姐頒獎儀式。
今次阿B袋過百萬做手錶代言人兩年，佢喺台上好感觸咁話：「呢個係我畢業（指結束四年破產生涯）後第一個job，好似打咗支強心針咁。」問佢呢過百萬係咪可以全部落自己袋？阿B笑晒咁話：「真係好高興，都係時候要納稅啦。」
操六嚿腹肌迎個唱
前晚萬聖節，阿B同溫拿四虎去柴灣齊齊影演唱會宣傳海報，今次個唱係為咗慶祝溫拿成立33周年而舉行，由出年2月18號年初一開騷，暫定六至八場。前晚溫拿五虎着晒西裝set晒頭，喺間布置成溫拿博物館咁嘅影樓度影相，只見現場放滿溫拿好有紀念價值嘅嘢，好似白金唱片同樂器咁，仲有阿B支色士風、阿強支價值六位數字嘅結他同埋阿倫自稱發迹時用過嘅咪頭。
阿倫話今次個騷會用新方法演繹舊歌，仲會以半舞台劇形式，搵其他artist扮佢哋，阿倫話：「好多人似㗎，區瑞強似彭健新，張堅庭似阿強，魏駿傑似陳友，仲考慮搵曾志偉扮我哋前經理人。」問佢哋會唔會操弗自己，阿B話：「呢度得我有潛質操六嚿腹肌咋！」影完相，除咗阿強外，其餘四人就去咗跑馬地包場開party歎蠔，陳百祥同黃杏秀、陳百燊同女伴都有到場。
