神奇隊長終於入波啦！利物浦周二主場以3:0大勝波爾多，正式穩奪歐冠盃C組出線席位，難得隊長謝拉特，下半場71分鐘，個人突破推進接近20碼，單刀建功，終於在今季聯賽加埋歐冠盃15場比賽，取得第1個入球；我求大俠都好戥謝拉特高興。
講真謝拉特季初因為參加完世界盃，狀態點都唔多唔少打折扣，雖然鬥心不損，不過好似有心冇力咁，好多入球機會都係爭啲爭啲。
而且紅軍領軍賓尼廸斯今季繼續玩變陣，謝拉特一時打右中場，一時又打進攻中場，甚至仲串演過左中場㖭，成日換位，真係幾好波都死。不過今仗賓尼廸斯就忽然轉死性，沿用番上場聯賽贏阿士東維拉3:1嗰個正選陣容，亦係賓尼廸斯近100場賽事中，第1次冇變正選陣容；繼續打右中場嘅謝拉特，當然生猛晒，更加入埋波㖭。
賓納可安心做後備
紅軍連贏兩場，賓帥又會唔會醒覺，不變應萬變，一路用番呢個贏波陣呢？如果係嘅話，首當其衝就一定係今季先由伯明翰加盟嘅賓納，可能之後就要排喺謝拉特之後，成為大後備嘞！
「講真車路士近季成功之處，就係摩連奴有一套固定陣容；不過賓尼廸斯之前帶隊好似打機咁，五時花六時變，睇吓呢次球隊有番起色，會唔會擺番個固定陣容啦。」