上星期喺公司趕稿，午夜1點收工去到旺角，正愁緊食乜好，突然諗起之前朋友經常介紹嘅「好旺角」，極力推介招牌菜炸醬麵，正當口淡淡之際，炸醬麵即成首選。Order一碗，先看賣相，炸醬唔似平常麵檔嘅顏色鮮艷，用料好足，夠撈一碗麵有餘。食啖先，炸醬慢慢傳出辣味，當中又嚐到多一種鮮味，口感好有層次，夾着麵條一齊食，吸晒啲汁，每啖都好滿足。原來呢道炸醬麵嘅秘方係老闆數十年前，輾轉之下向「金宮酒樓」借來，後來金宮結業，呢條秘方就只係「好旺角」獨有。一般炸醬麵用茄汁同辣醬，但秘方會加入海鮮醬，所以我食出陣陣鮮味。
記者黃若茵
炸醬麵$19
價錢經濟實惠，怕炸醬膩口的話，叫多碟油菜就perfect喇！
好旺角（23939036）
地址：旺角西洋菜街146號地下