很多香港人鍾情日本菜，而且愈來愈嘴刁，尤其愛刺身，唔新鮮唔矜貴都幾難入到佢哋嘅口，而有名你叫嘅「串神」偏向高難度挑戰，特別引入價值百幾萬嘅極品藍鰭吞拿魚，入口鬆化包你一試難忘。再食埋馬肉刺身又點睇？據師傅講食完可以增加性能力㖭！唔夠吸引？如果𠵱家半價有得食，唔使審已經心郁郁衝住去試啦！
記者：方綺君
攝影：楊錦文
Model：Bianca、Steve
剛迎合當造期
食日本菜，問十個人鍾意食乜，有九個都會話：「梗係食魚生。」餐餐日本菜食魚生不是問題，不過來來去去都是三文魚、拖羅同帶子，冇乜特別，又點可以滿足一眾嘴刁的港人呢！要試新嘢嘅話，又未必遇上合適當造期，又或者有幸遇上矜貴魚生，點知太貴食唔起！不過擅長捐窿捐隙搵食嘅我，居然發現咗位於旺角朗豪坊的「串神」，最近嚟咗批新鮮貨，除咗藍鰭吞拿魚外，仲有馬肉、阿拉斯加蟹腳及磯邊鮑魚等，全部係矜貴食材。不過最吸引嘅，就係減至半價有得食，淨係聽到都已經流晒口水啦！
藍鰭吞拿魚必食
向來識飲識食嘅人，都知道在眾多魚生刺身中，藍鰭吞拿魚屬極品，平均每條重200至300公斤，價值可逾百萬港元，大廚和哥話︰「藍鰭吞拿魚肉嘅油脂分布均勻，好似雪花和牛咁，我最鍾意食魚腹，因為入口唔腥啖啖肉，簡直係五星級享受。」此外，和哥仲問我：「你有冇食過櫻花肉刺身呢？」我當堂答不上口，心諗唔通櫻花都可以做刺身！和哥即刻打圓場：「即係馬肉。以前香港唔可以賣馬肉㗎，不過我哋嘅馬肉有食環處證書，所以有晒保證唔使怕。」要食馬肉真係可遇不可求，唔係成日都有嚟貨，和哥話$168已經係成本價，真係點食都抵。
抵食第1位：藍鰭吞拿魚刺身
原價$280
半價$140
藍鰭吞拿魚是貴價貨，魚肉的油脂分布均勻，大廚和哥話：「藍鰭吞拿魚即係金槍魚，要天然解凍，解凍後魚身會有一層薄薄嘅油鋪響面咁。所以切成片後入口特別嫩滑，亦無腥味。」
抵食第2位：磯邊鮑魚刺身
原價$260
半價$130
南非來的磯邊鮑魚限量供應，要食就要預訂喇。鮑魚唔使醃，刺身食法已經好好味，咬落爽甜，食得多都唔覺膩。
抵食第3位：櫻花肉刺身
原價$268
特價$168
聽個名好有詩意，其實係馬肉，絕對唔係非法入口，有晒入口證書，食都食得有保證。日本人想個名靚啲先叫櫻花肉，食的是馬大腿近臀部的位置，貪呢部份成日郁夠彈口，據說日本人認為食櫻花肉可以增強性能力㗎！
抵食第４位：阿拉斯加蟹腳紙鍋
原價$128
半價$64
大廚和哥：「阿拉斯加蟹好貴，因為一年得一個月捕捉期。」一般的阿拉斯加蟹捉後會立刻急凍保持鮮味，作鍋物蟹的肉汁會流入湯中，味道鮮甜，記得飲埋湯。
其他抵食推介
寶鰈魚揚
原價$90
半價$45
即係炸寶鰈魚，每日供應量有限。寶鰈魚洗淨去內臟後原條連骨炸，連骨食好香口，點埋酸汁食特別開胃。
燒沙律
$38
沙律點樣燒？就是將沙律包在日本腐皮內燒，日本出產嘅腐皮比香港的厚身，特別有豆腐味，內包生果沙律，一冷一熱，是大廚和哥的最新出品。
豆腐甘露（前）、焦糖咖啡果凍（後）
原價$28
半價$14
以楊枝甘露做藍本的豆腐甘露，將原本嘅果汁底變成豆漿底，內有豆腐雪糕和豆腐啫喱，加上西柚和不同生果，白雪雪的豆腐甘露清新登場。
食客都話抵！
搵食攻略
串神（35144333）
地址︰旺角亞皆老街8號朗豪坊12樓9號店
營業時間︰
星期一至五12:00nn-3:00pm、6:00pm-11:00pm
星期六、日及公眾假期12:00nn-11:00pm
座位︰約80位
平均消費︰$100至$120