摷袋兵團首次出擊，殺到銅鑼灣東角駅門外，睇吓自認潮爆嘅香港女仔，隨身帶住乜嘢流行IT物。唉！點知摷袋過程中，最唔想見到嘅終於發生。問十個少艾，九個隨身IT恩物都係iPod。雖然係夠潮啫，但次數出現太頻密，見到都覺得膩。不如先睇唯一唔用iPod嗰位姑娘仔點講。
喺東角駅等緊人嘅Doris，雖然佢個袋裝住遊戲機又有DC，不過佢話最貼身嘅，都係呢部Creative紫色MP3機。問佢點解唔用iPod，佢坦言話：「人哋用係人哋嘅事，自己唔多鍾意跟風。」加上佢對聽歌嘅音色冇乜要求，平平哋有部MP3機聽吓已經夠晒。最抵死佢仲話：「我唔覺iPod啲聲特別好聽喎！」認真有性格。
轉個頭又見到另一位蘇小姐，佢話自己用緊iPodShuffle。筆者心諗，唔通係嗰款啱啱出街嘅衫夾Shuffle？點知原來係再之前嗰款，早幾年嗰隻！問佢點解鍾意呢部機，佢話：「冇乜MP3機輕得過佢，隨身帶住梗係愈輕愈好，我有好多朋友都係因為咁先買佢。」典型女性買機心態，男士想送MP3機畀女仔嘅話，好好記住喇！
記者：陸俊雄
攝影：楊錦文
