佛利民老馬有火，繼撰文批評曾特首放棄積極不干預政策之後，接受《星期日南華早報》教育版訪問，猛烈抨擊香港欲實行之有限制學券制。佛老已經九十四歲咯，好似不方便旅行，否則嘅話，香港幼稚園團體大可夾份邀請佛老來港開論壇，向特區政府開炮，以佢嘅身份，李國章局長不可以不回應，到時你一言，我一語，相信哄動世界傳媒。
老校長見李局長對「牟利」、「非牟利」兩者之分別咁執着，有感而發，對左丁山講：「你讀經濟學，應知道牟利並非罪惡，呢個世界上，如果冇牟利呢回事，會落後窮困好多，正如毛澤東在生時的中國不准牟利、不准私人企業開辦，結果係人民一窮二白。冇牟利呢個誘因，邊度會產生滙豐銀行呀！牟利係一定要嘅，問題係將啲利潤點樣運用，非牟利幼稚園賺到嘅利潤（上限5%，由教統局規定）唔准分配畀股東，要積累起來，用於學校，牟利幼稚園賺到嘅利潤（上限10%），可由股東運用，其實有唔少亦係用於學校。經營成功嘅企業，總唔會將啲利潤派晒息，而係留番唔少做儲備，牟利學校管得好嘅話，道理亦係一樣。你話哈佛耶魯史丹福辦學有冇錢賺呢？當然有啦，佢哋賺得愈多，學校更多錢撥作研究。」
老校長又話如果抱着做生意之心去辦幼稚園牟利，三年之內一定執笠。辦學校要抱住為教育之心，辦得好，家長捧場，學生來源不愁，學費可以收貴啲，咁就可以牟利嘞。辦好學校是因，賺錢是果。千祈唔好抱住賺錢之心來辦學．借用孟子一句話：「行仁義，其利自至。」從呢層意思睇，唔賺錢嘅學校。唔會好得去邊。咁多津貼中小學係band3級，在市場機制下，老早被淘汰，唔使由教統局殺校了。香港中小學教育弊在冇市場機制，樣樣由政府管。幼稚園全部私立，教統局其實一樣睇到實，引入A貨學券之後，管得會更緊。記住，政府睇得緊，唔等於學生會得益，睇吓啲中學生一般水平就知道嘞。