車路士有大水喉班主阿巴莫域治射住，所以球員搵嘅人工全部都係天文數字，不過車仔喺嚟緊嘅聖誕節，計劃考吓班球員嘅諗頭，叫佢哋喺聖誕派對交換禮物嘅環節嗰陣，禮物唔可以超過5鎊（約74港元），對不嬲使慣錢嘅球星們，確實係一項幾大嘅挑戰。
食完飯畀貼士都唔夠
記得前年車路士奪得聯賽冠軍之後，隊長泰利就已經用咗成20萬鎊買啲名錶送畀隊友，直頭當嗰啲係遊戲「大富翁」嘅錢，完全唔係啲咩。車仔高層有見及此，嚟緊嘅聖誕節就叫班球員買啲有意思嘅禮物返嚟，睇吓佢哋除咗識得買車買樓同買飛機之外，識唔識得買樣只係價值5鎊嘅禮物送畀隊友，聽落又真係幾盞鬼。
睇番泰利同林柏特嘅周薪有成10萬鎊，而舒夫真高同波歷克就13萬鎊，所以5鎊對佢哋嚟講，同喺餐廳食完晚飯畀貼士、喺街度畀乞兒嘅數目真係不相伯仲。𠵱家仲叫佢哋買份有意義嘅禮物返嚟，我求大俠就覺得好高難度囉。
聽番車仔啲高層講，呢幾年班球員買嘅聖誕禮物唔係超名貴手錶，就係價值連城嘅手袋，當隊友收到後都冇乜驚喜，因為屋企大把吖嘛，你想恨死啲星斗市民咩？！
「估唔到車仔除咗大把水之外，高層諗嘅嘢都咁有意思，計落總好過班球員喺度大show身家，買埋啲唔等使嘅嘢，呢個諗頭抵讚啦！」