鞏俐同愛爾蘭壞男孩哥連菲路（ColinFarrell）喺電影《邁阿密風暴》（MiamiVice）裏面有多場情慾戲，因而被傳撻着。前晚佢兩個手拖手現身北京新世紀影城，出席該片首映禮，大批圍觀者為爭睹兩人風采而一度引起混亂，就連好少出席首映禮嘅葛優都嚟捧場。
貼身侍候
因為哥連菲路唔識講中文，所以全程顯得好唔自然，鞏俐就好細心咁不時以身體語言提示哥連菲路望住鎂光燈，接受訪問時又為對方解話，指哥連菲路嘅性感係藏喺黑衫裏面，唔輕易俾人捕捉。不過原來哥連菲路都學識咗幾句簡單嘅普通話，仲大派用場講咗聲：「謝謝。」台下即報以熱烈掌聲。
喺《邁》片裏面，鞏俐同哥連菲路有唔少情慾鏡頭，首映禮上，哥連菲路大讚話：「鞏俐太性感了。」佢仲話第一次喺張藝謀嘅電影見到鞏俐時，已經覺得佢係性感尤物，驚為天人，鞏俐即刻禮尚往來話：「哥連菲路很帥，也很性感。」
另外，張藝謀噚日接受RoadShow訪問，宣傳新作《滿城盡帶黃金甲》，大讚周潤發同周杰倫表現出色，不過當被要求比較舊愛鞏俐同章子怡時，佢就話：「她們兩個都是優秀的演員，都是行業中的佼佼者。媒體都不了解，我最清楚她們對事業有無限的熱愛，她們都沒有功利心，對身外物都看得很淡。」
