大記者夫婦辭職後，未搵到工就去歐洲旅行一個月，散吓心先。辛苦工作二十幾年，未試過咁得閒，且暫時將搵食壓力丟開，去外地充吓電，返嚟再搏殺。佢兩個好彩唔旨在慳錢，未等到甘泉啓航，就坐國泰航機去咗倫敦，果然省時省力，否則就會激到紮紮跳。
佢兩個一走，竟然有人打電話畀左丁山，話想斟大記者過檔，請代為轉介，左丁山當然費事理啦，無謂騷擾大記者二人世界嘅安寧。想唔到，大記者來電：「現在係倫敦朝早十點，有太陽出，天氣極好。我兩個啱啱行完海德公園一圈，感覺非常良好，昨晚去聽歌劇《孤星淚》，五十鎊一張飛，音樂好，演出美妙，真冇得彈。倫敦好玩到極，應該留耐啲。」左丁山話：「有錢就好好玩，倫敦萬物昂貴，正是長安不易居！」大記者話：「我哋住一間酒店，房間好細，千八蚊港紙住兩晚，海德公園外邊嘅酒店，收三千蚊一晚。啲錢係要慳住使㗎。」
倫敦二十年前有BigBang，金融市場徹底向外開放，於是英國帝國留傳下來嘅大投資銀行、證券商，無論有幾多百年歷史，終於俾美國華爾街牛仔收購晒，傳統蕩然無存。正因為咁，今天倫敦成為世界上最自由，最有活力嘅金融首都，將紐約比下去，隨之而來嘅係一批批「地球人」，源自五湖四海，以倫敦為工作、睡覺地方，不以倫敦為家。佢哋薪酬高（分分鐘有花紅等於幾十個月薪水），喺TheCity放工，就去HarveyNichols、Harrods買食物，生活水平與倫敦中產階級完全脫節。倫敦𠵱家多咗咁多有錢人，文化藝術，名酒美食，時裝名車，無不大放異彩，我哋鄉下人去倫敦見識吓，如劉姥姥入大觀園，住番起碼三個月先至識得多啲。可惜吖，我哋邊度有時間、有銀紙去倫敦住番三個月酒店吖。英國中產都要逃離倫敦，日日坐個零鐘頭火車返工啦。大記者夫婦去完倫敦去巴黎，吸收靈氣，在倫敦體驗現在與將來，在巴黎發思古之幽情，返到香港，相信更會下筆如飛。