於歐冠盃算係越級挑戰嘅索菲亞利夫斯基，分組賽對住3支攻力強勁嘅球隊，出局係遲早嘅事；相反佢今場對手雲達不來梅自從主場以1:1打和巴塞後，狀態就立即返晒嚟，打落連贏5場，合共入20球，就連向來稱霸德甲嘅拜仁亦難逃輸波厄運。最令人難以想像嘅係雲達向來都有前冇後，但近期後防線竟明顯堅固起來，近5場只失兩球。況且巴塞上場失分，雲達大有機會後來趕上，今場一定搏到盡贏波。為求穩陣起見，可以揀主客和嘅「客勝」。
基輔戴拿模無復當年勇
里昂今季聯賽加埋盃賽已連贏13場，成績穩定。佢哋喺歐冠盃分組賽除3戰全勝、攻入8球外，仲能夠保持冇失波，的確攻守兼備。今場美中不足係巴西射手費特因傷缺陣，但「罰球王」祖連奴比南布肯奴、馬隆達及堤亞高文廸斯等主力狀態大勇，況且里昂入球唔係單靠一個球員，相信唔會有太大影響。基輔戴拿模已無復當年之勇，目前3場輸晒兼失12球！主場都要淨輸3球，作客唔畀里昂大炒就有鬼！
阿鵬
有線球彩台主持
電郵：[email protected]