美國部份投資網站聲稱，炒外滙可「長期」每月賺取35%至40%回報。在《Talkgold》討論區，網民letsearn4ever問，有冇咁着數？
網友pluggy大潑冷水說：「如果真係咁好搵，點解美國𠵱家仲有8萬億美元（約62.4萬億港元）國債？美國只要每月出幾千美金，請個交易員炒外滙，十年八載，就可還清國債啦！呢個世界仲有窮人？」
adastfe亦認為，投資冇可能一定賺，他表示：「有啲人投資一年，可賺1萬以至100萬美元，但至今依然做唔到億萬富豪。佢哋闖出名堂後，就出書賺錢，教人點樣搵快錢；如果投資真係有賺冇蝕，佢哋仲使乜咁辛苦寫書？」
博賺供車錢
另外，在《Uwants.com》討論區，網民olivia0319話有一兩千蚊，希望喺一星期或一個月內賺一倍，用嚟供車，唔知炒外滙有冇咁好搵？
網民L24回應說：「你唔熟悉外幣，又想從中搵食，好容易蝕本兼欠人錢；如果我話知道點樣搵快錢，你都唔好信我啦！」lhca2說這根本就係賭博，不如買鋪大細仲好，唔使煩嘛。
事實上，就算是「美國股神」畢菲特，也有「跌眼鏡」的時候，這位美元淡友，去年在滙市失利，賬面上輸掉9.55億美元（約74.5億港元），因為美滙指數其間累計銳升近13%。美滙指數今年重陷跌軌，迄今跌6%，又輪到美元好友處下風。